مـنـتـديـات الـمســيح هــو الله


نـــرحـــب بــــك عزيـــزى الضــــيف الكـــــريـــــم
و نــدعــــوك الــى التـــســـــجيـــــل بالمـــنــتـــــــدى
الــــــــرب يســــــــوع مــــعــك دائـــمــــا



† † †




رحلة إلى كنيسة القديسة كاترين بالإسكندرية

استعرض الموضوع السابق استعرض الموضوع التالي اذهب الى الأسفل

رحلة إلى كنيسة القديسة كاترين بالإسكندرية

مُساهمة من طرف اسطفانوس في الإثنين أكتوبر 15, 2012 4:07 pm




(((((( الموضوع منقول ))))))


سلام المسيح لكل أعضاء ومشرفي ومديري منتدى قداسة البابا شنودة الثالث .....




زي ما إتعودنا مع بعض في كل رحلة نطلعها إنها تكون مفاجأة لكل أعضائنا ...
والمرة دي هانطلع رحلة من أجمل الرحلات اللي ممكن نطلعها ورحلتنا النهاردة
إلى كنيسة القديسة كاترين لللاتين الكاثوليك بحي المنشية بمدينة الإسكندرية
عروس البحر الأبيض المتوسط ودي تعتبر من أكبر وأقدم الكنائس اللي موجودة
في إسكندرية وبصراحة من أفضل الكنائس اللي قمت بزيارتها شخصياً لأنها كنيسة
بتتميز بهدوء كبير وروحانية عالية فقولت لازم أطلع معاكم الرحلة دي ونشوف
مع بعض معالم هذه الكنيسة الرائعة واللي أيضاً بتعتبر دير كبير للآباء
الفرنسيسكان ... هاه مين عايز يطلع معايا ؟ .... يااااه واضح إن فيه إقبال
كبير زي كل مرة ... أوك كله يحضر شنطته ويجيب معاه سندوتشاته وزمزمية المية
بتاعته عشان الرحلة طويلة والدنيا حر ماتخافوش هانطلع على البحر شوية ...
الكل مستعد يلا بهدوء هانطلع الأتوبيس وبالدور يا شباب كلنا هانروح وكلنا
هناخد بركة بس بهدوء من فضلكم ... إطلع يا أسطى على إسكندرية ...










دلوقتي يا شباب إحنا قربنا على حي المنشية بمدينة الإسكندرية واللي فيها
كنيسة القديسة الشهيدة كاترين لللاتين الكاثوليك الكنيسة جميلة للغاية
ومبنية على الطراز الأوربي حتى الشارع اللي فيه الكنيسة إسمه شارع سانت
كاترين بالمنشية ... بس يا أسطى على جنب هنا ... يلا يا شباب هاننزل هنا
بهدوء وبالراحة ياريت نراعي النظام عشان نطلع رحلات تاني ... إحنا أهو قدام
الكنيسة بالظبط ... شايفين جميلة إزاي ؟ ...










هانمشي في الممر ده شوية كده لغاية ما نوصل للباب ....










بس قبل ما ندخل الكنيسة هانشرح مع بعض بعض التفاصيل عن واجهة الكنيسة زي ما
إحنا شايفين هنلاقي تمثال من الرخام الأبيض للقديسة كاترين فوق باب
الكنيسة على طول ...










كمان هنلاقي هنا على اليمين تمثالين لاتنين من القديسين العظماء زي ....




القديس الأب أنطونيوس البادوي وهو شايل الطفل يسوع ...










وتمثال تاني للقديس الأنبا أثناسيوس الرسولي ...










برضه هنلاقي على الشمال إتنين من القديسين برضه زي ....




القديس الأب فرنسيس الأسيزي مؤسس الرهبنة الفرنسيسكانية ...










وجنبه في الآخر خالص تمثال للقديس البابا كيرلس الأول عامود الدين ...










ندخل بقى الكنيسة من جوه ونشوف ونتعرف على تفاصيل أكتر عنها ... ده منظر عمومي للكنيسة من الداخل ...










أول ما هاندخل هنلاقي على الشمال تمثال كبير وجميل جدا لسيدتنا العدرا أم النور وهي شايلة الطفل يسوع ....










بعد التمثال هنلاقي قدامنا جرن معمودية من الرخام الأبيض يعلوه من فوق
تمثال صغير للقديس يوحنا المعمدان ... زي ما إحنا شايفين كده ....










بعد كده برضه في الصف الشمال هنلاقي تمثال جميل جدا للقديسة العظيمة ريتا
شفيعة الحالات المستعصية وهي ماسكة صليب من الخشب وسبحة من الخرز الأحمر
....










قدام تمثال القديسة ريتا هنلاقي حاجات جميلة لفتت إنتباهي بصراحة وهي ...
ده صندوق أو دولاب من الخشب يحتوي جواه على مجموعة من النذور المعدنية
وغالبا ما تكون من الفضة وهي عبارة عن أشكال زي اليد والقدم والقلب الأقدس
... يعني مثلا لو حد مريض بمرض في ايده أو رجله أو قلبه وطلب طلبة من
القديسة كاترين وتم شفائه منه بييجي ويحط مكانه ايد فضة او رجل فضة او قلب
فضة ... وهكذا ... وفيه زيه على فكرة في كنيسة سانت تريزا بحي شبرا
بالقاهرة ...










واللي قدامنا هنا ده إسمه كرسي الإعتراف أب الإعتراف بيدخل جوه هنا ورا
الستارة الصفرا دي ويقفل على نفسه الستارة وييجي المعترف بخطاياه يكلمه من
ورا الستارة وده عشان المعترف ما يحسش بأي إحراج أو خجل كذلك عشان ما
يتعرفش الكاهن على شخص المعترف ... ودي حاجة كويسة بصراحة ....










هانرجع تاني للصف الشمال هنلاقي برضه تمثال كبير وجميل جداً للقديس العظيم يوسف النجار وهو شايل الطفل يسوع ....










بعد تمثال القديس يوسف النجار هنلاقي تمثال تاني من الرخام الأبيض للسيد
المسيح فاتح ذراعيه وواضح على صدره القلب الأقدس وهو تمثال القلب الأقدس
ليسوع ....










بعد كده هنلاقي 3 تماثيل جميلة جدا في النص هنلاقي تمثال كبير من الرخام
الأبيض للعدرا أم النور وعلى اليمين تمثال القديسة تريزا وعلى الشمال تمثال
القديسة الشهيدة لوسيا أو سانتا لوتشيا ...










جنب التلات تماثيل دول هتلاقي تمثال ملون بالحجم الطبيعي للسيد المسيح فاتح ذراعيه بشكل جميل جداً .....










ولما نيجي نبص فوق التلات تماثيل هنلاقي 3 صور مرسومين في السقف من اليمين
للشمال صورة مار مرقس الرسول وصورة البشارة وصورة مار يوحنا الرسول ...










نيجي بقى للجزء الأهم في الكنيسة وهو المذبح المقدس اللي بيقام عليه القداس الإلهي كل يوم أحد ...










ولما نبص لجوة أوي هنلاقي باب صغير من الفضة أو دولاب صغير يحتوي بداخله
على كأس الذخائر المقدسة اللي هو القربان المقدس والدم الكريم واللي بياخد
منه الأب الكاهن الجسد والدم خلال القداس ....










فوق المذبح في السقف هنلاقي صورة للسيدة العذراء مريم وعلى اليمين والشمال اتنين من الملايكة










ورا المذبح هنلاقي صورة كبيرة جدا للقديسة كاترين وهي بتعترف بإيمانها أمام
الإمبراطور ماكسيميانوس وسط مجموعة من أمراء ورجال الدولة وبعض الجنود ...










ورا هنا هنلاقي منبر من الخشب يعلوه من فوق تمثال القديسة كاترين واللي
بيطلع فيه الكاهن للوعظ كما هو متعارف في جميع الكنائس في ذلك الوقت ...










نيجي بقى للصف اليمين بجوار المذبح هنلاقي تمثال كبير من الرخام الأبيض
للقديس فرنسيس الأسيزي مؤسس الرهبنة الفرنسيسكانية وعلى اليمين تمثال
للقديسة الأميرة أليزابيث أميرة المجر وعلى الشمال القديس لويس التاسع ملك
فرنسا وهو شايل إكليل الشوك الذي لمخلصنا الصالح ...










فوق التلات تماثيل هنلاقي مرسوم في السقف 3 صور برضه زي اللي فاتوا من
اليمين للشمال مار لوقا الرسول والقديس فرنسيس وهو بيتسلم جراحات الصليب
الخمسة وعلى الشمال خالص صورة مار متى الرسول ...










بعد التلات تماثيل هنلاقي تمثال حلو خالص للقديس الأب أنطونيوس البادوي
العجائبي وهو شايل الطفل يسوع وده لأن المسيح كان بيظهر له في شكل طفل صغير
وكان القديس أنطونيوس يسهر معاه ويتكلم معاه طول الليل ...










بعد تمثال القديس أنطونيوس هنلاقي تمثال رهيب للغاية وفي منتهى الروعة
لصليب رب المجد وعلى يمينه أم النور العدرا مريم وعلى شماله القديس يوحنا
الحبيب ... بجد تمثال مؤثر جدا ...










كمان هنلاقي هنا في نفس الصف تلات تماثيل تمثال كبير برضه للعدرا في النص (
سلطانة الوردية المقدسة ) وتحتها على اليمين القديس دومينيك الكبير مؤسس
الرهبنة الدومينيكانية وعلى شمالها القديسة كاترين السيانية ( من سيينا )
وعلى يمين تمثال العدرا تمثال القديس بطرس الرسول وعلى الشمال تمثال القديس
باتريك مبشر أيرلندا ....










على فكرة يا جماعة ... ليه فيه صوت ؟ ... زي ما احنا شايفين الكنيسة هادية
جدا ومافيش حد غيرنا ... ياريت الهدوء ... وخصوصاً إننا هاندخل على مكان
يعتبر مفاجأة رحلتنا وهو مزار لقديسة عظيمة وشهيدة رومانية تدعى القديسة
سابينا واللي جسدها لم يرى فساداً حتى يومنا هذا ... طبعاً مش مصدقين ازاي
قديسة من العصر الروماني ولسه جسدها ما اتحللش ... يلا ندخل ونشوف ونعاين
بعينينا مدى عظمة هذه القديسة ... إحنا أهو على باب المزار ...










وزي ما إحنا شايفين قدامنا ... بصوا ... تعالوا قربوا ... ماحدش يخاف ...








ده وجه القديسة من قريب هنلاحظ بدرجة كبيرة ان الأسنان واضحة جدا وسليمة
كما إن العين نص مفتوحة والشعر الأصفر كما هو وكأنه لم تمر قرون عديدة على
شهادة هذه القديسة العظيمة سابينا ... فعلا عجيب هو الله في قديسيه ....










آخر حاجة هانشوفها في الكنيسة وإحنا خارجين فوق في السقف هنلاقي صور لبعض من آباء الكنيسة الأوائل زي ...




البابا كيرلس عامود الدين ...










القديس العظيم الأنبا أنطونيوس أب كل الرهبان ....










القديس العظيم الأنبا أثناسيوس الرسولي ....










وأخيراً الدولاب اللي فوق ده إسمه الناقوس وهو عبارة عن آلة موسيقية بأزرار
زي البيانو بالظبط لكن ليها صوت مختلف تماماً عنه لأنه الصوت بيطلع بالنفخ
من خلال دواسات وبيخرج الصوت من الأعمدة الحديد دي وكل عامود له صوت مختلف
تماما عن اللي جنبه ....










بسرعة بسرعة خلصت رحلتنا وعلى وعد برحلة أخرى بإذن الله وأتمنى يارب تكونوا
استمعتم معانا برحلة كنيسة القديسة كاترين لللاتين الكاثوليك بالإسكندرية
وأخدنا بركة كبيرة وبركة صلوات القديسة كاترين تكون معانا وتوصلنا بالسلامة
إن شاء الله ... معلش مش هانلحق نطلع على البحر النهاردة ... يلا نركب
الأتوبيس على طول علشان نروح قبل الليل ... كلنا نركب الأتوبيس بنظام لو
سمحتم ... الهدوء من فضلكم ... مافيش فايدة ... شنطة مين دي ؟ ... يلا يا
أسطى يلا بسرعة ...




فرووووووووم








حمد الله على السلامة يا شباب




ملحوظة صغيرة : أنا آسف يا شباب جداً لصغر الصور أو قلة جودتها لأني بعد ما
صورتها بالكاميرا بتاعتي وجيت أرفعها على المنتدى لقيتها هاتبقى كبيرة
جداً وكان هايبقى منظرها مش لطيف فاضطريت أصغرها شوية بحيث يكون شكلها
معقول .


(((((( الموضوع منقول ))))))
avatar
اسطفانوس

خـادم الرب
خـادم الرب


ذكر
تاريخ التسجيل : 06/12/2010
عدد المساهمات : 326
شفيعى : الرب يسوع
نقاط : 566
الديانة : مسيحى

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى